Bleona: E dua botën në duart e mia

Bleona Qerreti, e cila së fundi ishte ndër më t përfolurat në shtypin rozë për deklaratat e saja, ka premtuar se do të jetë më e përfolur se kaq, sapo të lançojë albumin e saj të radhës.
Këngëtarja nga Shqipëria në albumin e saj të ri është duke punuar me disa nga emrat më të njohur në botë, mes së cilëve Timbaland.

“Do të jem e lumtur vetëm kur të dëgjoj veten në radio. Është koha që unë të jem njëlloj si personazhet e famshëm të cilët kam takuar, sepse asgjë nuk është e pamundur pa punë. Por natyrisht fama dhe suksesi nuk arrihen lehtë. Unë kam sakrifikuar çdo gjë për të realizuar ëndrrën time dhe them një shprehje: ose do kem botën në duart e mia ose nuk do rresht së provuari deri në frymën e fundit!”, ka thënë Bleona për “Standard”.

Bleona për tashmë disa herë ka sqaruar ‘gabimin’ e saj që nuk ishte prezantuar si një shqiptare dhe që kishte refuzuar të thotë faleminderit në shqip gjatë një interviste për mediat amerikane.

“Po e them për të disatën herë që ky ka qenë një keqkuptim i madh. Dua të sqaroj se me fjalët e mia është spekuluar jashtëzakonisht shumë, ndoshta nga persona me qëllim të caktuar. Kanë luajtur me pikën më të dobët të shqiptarëve, siç është patriotizmi. Kjo është bërë ndoshta thjesht për të shitur gazetat, por ama duke hedhur poshtë e përbaltur punën time”.

“Unë jam shumë krenare që jam shqiptare, nuk kam absolutisht arsye të mohoj origjinën time dhe ashtu sikurse e kam shprehur, po pres momentin e duhur për një intervistë ekskluzive në një TV prestigjioz, ku do të flas më gjerësisht për jetën time. Ajo intervistë që keni parë ju, ishte fokusuar më tepër në faktin që unë kisha marrë pasaportën amerikane, por nuk mund të ngatërrosh pasaportën me kombësinë”, ka thënë Bleona.