Bllokohen faqet pirate

Pak kohë përpara ndeshjes finale të
kampionatit të futbollit amerikan, që njihet ndryshe si “Super bowl”,
prokurorët në Shtetet e Bashkuara bllokuan 16 faqe interneti që
transmetonin eventet sportive live dhe ato “pay per view” të
televizioneve apo platformave televizive të të gjithë botës.


Të paktën një person nga
Michigani u padit për menaxhimin e 9 prej faqeve abuzive të internetit.
Sipas qeverisë, faqet ofronin lidhje të cilat u krijonin shikuesve
mundësine për të parë programe nga liga kombëtare e futbollit, shoqata
kombëtare e basketbollit, liga kombëtare e hokejt e kampionati botëror i
mundjes, kampionatet e futbollit të shumë vendeve të Europës etj.

Një pirateri e tillë sipas prokurorëve u ka kushtuar ligave dhe
transmetuesve të këtyre eventeve miliona dollarë në vit, e një pjesë e
kësaj kostoje rëndon mbi blerësit e biletave apo të abonuarit në rrjetet
sportive.

Faqe të tilla dhe operatorët e tyre i privojnë
ligat sportive dhe mediat televizive nga të ardhurat e tyre të ligjshme.
Kjo praktikisht është vjedhje, tha në Manhatan prokurori Preet Bharara,
i cili bëri publik lajmin e bllokimit të tyre.

Puna për këtë
bllokim nisi të enjten. 28-vjecari nga Michigani, Yonjo Quiroa do të
përballet me akuzën e shkeljes së të drejtës së autorit. Quiroa i cili
njihet edhe si Ronaldo Solano, e menaxhonte faqen nga shtëpia dhe kishte
përfituar të paktën 13.000 dollarë nga persona të interesuar për të
reklamuar online.

Padia ndaj 28-vjecarit i referohet
përpjekjeve të tij për pirateri nga shkurti 2010 deri në janar të ketij
viti. Aksioni jo pa qëllim u realizua në prag të finales së kampionatit
dhe synonte pikërisht të dërgonte një mesazh simbolik në vazhdën e
luftës ndaj piraterisë televizive.

Super bowl konsiderohet
ngjarja më e madhe sportive e Shteteve të Bashkuara të Amerikës dhe
biletat për ndeshjen finale janë jo vetëm të shtrenjta, por edhe
vështirë për t`u gjetur. Cmimi varion nga 800 deri në 1.200 dollarë
copa, ndërsa ato që rishiten momentet e fundit mund të mbërrijnë deri në
16.000 dollarë.

Fenomeni i piraterisë prek në mënyrë të
vazhdueshme të gjitha sportet që transmetohen në televizionet e mbarë
botës duke u shkaktuar dëme të mëdha rrjeteve televizive dhe platformave
të ndryshme që kanë paguar për të patur të drejtat e transmetimit të
tyre.