Zyrtare: DMX më 10 prill në Prishtinë

Pas shumë spekulimeve dhe zërave për anulimin e turneut të
reperit të njohur amerikan, DMX, është konfirmuar edhe zyrtarisht se më
10 prill ai do të mbajë koncertin e planifikuar në Prishtinë. Kështu
ka konfirmuar për Telegrafin drejtori i NextLevel, Ardin Badivuku, i
cili thotë se tashmë kanë filluar përgatitjet për koncertin e madh që do
të mbahet në sallën “1 Tetori”.

“Pasi turneu u anulua në janar nga kompania Heavy Rotation, e cila
dhe e ka paditur DMX, tani ai ka marrë pasaportën dhe turneun do ta
mbajë ashtu siç është planifikuar, por me një agjenci tjetër. Kompania
StreetLife nga Gjermania më ka dërguar konfirmimin se më 10 prill DMX do
të mbajë koncertin në Prishtinë dhe me këtë rast ftojmë të githë fansat
që të bëhen gati për një ngjarje të pa harruar. E dimë se ka pasur
shumë zëra dhe spekulime, por tani gjithçka dihet zyrtarisht”, ka
deklaruar Badivuku.

DMX konsiderohet si një prej reperëve që kanë lënë gjurmë në
historinë e repit amerikan, me hite si “Lord Give Me A Sign” dhe “Party
Up”. Biletat do të dalin së shpejti në shitje, ndërsa koncerti do të
mbahet në sallën “1 Tetori” në një performancë të shumëpritur që do të
zgjasë për më shumë se 1 orë.