Njëqind vajza në garë për Miss Univers Kosova

Në garën për Miss Universe Kosova këtë vit kanë aplikuar rreth
100 vajza. Kështu bën të ditur Agron Selimi, president i kompanisë “Art
Motion”, e cila është edhe organizatore e kësaj ngjarjeje. Të dielën në
Sheshin 21 në Prishtinë do të bëhet edhe seleksionimi i dytë i 100
vajzave kandiduese për garën e madhe të Miss Universe Kosova 2012.“Interesimi
i kandidatëve që aplikuan ishte jashtëzakonisht i madh dhe arriti
numrin 278, nga të cilat kushtet bazike i plotësuan 100 kandidate”,
citon Kosovapress fjalët e Selimit.

Juria profesionale do të përzgjedhë 21 vajza të cilat do të vazhdojnë
garën më tutje, e të cilat do marrin pjesë në spektaklin final në
Prishtinë të datës 21 qershor 2012 që do përcillet drejtpërdrejtë nga
mediat vendore.

Gara përbëhet nga katër kategori: bikini, fustan i shkurtër, fustani i
mbrëmjes, veshje sportive dhe intervista personale, sepse, sipas
organizatorëve “qasjet e shekullit 21, përcaktojnë që kandidatet duhet
të posedojnë kombinimin e inteligjencës me bukurinë”.

“Këtë e kushtëzojnë sukseset e kaluara që siç jeni edhe ju në dijeni,
me vite radhazi janë të kurorëzuara me plasime të larta kandidatet Zana
Krasniqi, Marigona Dragusha, Kështjella Pepshi dhe Afërdita Dreshaj nga
Kosova. Ky sukses i arritur ka edhe sot e kësaj dite afirmimin e madh
ndërkombëtar të Kosovës, me ç’rast jehona e madhe vërehet nëpër forumet
elektronike dhe mediumet tjera”, ka shtuar Selimi.

Organizata Miss Universe Kosova posedon të drejtën zyrtare për
Organizimin e spektaklit të bukurisë nga Miss Universe Organization për
përzgjedhjen e kandidates pjesëmarrëse nga Kosova. Organizimi i
spektaklit të tillë është i rëndësisë së prezencës ndërkombëtare të
pjesëmarrëseve nga Kosova.

Miss Universe Kosova njofton se në proces të përmbushjes së detyrës
së saj me pjesëmarrjen e shtetit të Kosovës në garën më të njohur
ndërkombëtare të përzgjedhjes së Miss Universe 2012 e transmetuar nga
kanali televiziv NBC, organizon përzgjedhjen e kandidates me të denjë ne
spektaklin final me datën 7 dhjetor 2012.