Kosova Hackers Security sulmon motin ne SHBA

Rrjeti kompjuterik i Shërbimit Kombëtar të Motit në Amerikë është
sulmuar gjatë kësaj jave, ku një grup hakerësh nga Kosova kanë marrë
përgjegjësinë dhe kanë publikuar të dhëna të ndjeshme.

Këtë informatë e ka kanë konfirmuar ekspertë të sigurisë , të cilët
thonë se të dhënat e publikuara nga grupi "Kosovo Hackers Security"
përfshijnë struktura të direktivave, skedarë të ndjeshëm të serverit të
rrjetit dhe të dhëna tjera që mundësojnë qasje të mëvonshme.

"Grupi i hakerëve kanë deklaruar se sulmi është një protestë kundër
politikës amerikane që sulmon vendet muslimane", thotë eksperti i
sigurisë, Chrysostomos Daniel nga kompania "Acunetix", raporton "Zëri".

"Për më tepër, sulmi ishte një shpagim për sulmet e hakerëve ndaj
centraleve bërthamore në vendet myslimane. Një anëtar i grupit sulmues
ka thënë, 'Ata sulmojnë centralet tona bërthamore duke përdor programe
dashakeqe siç janë STUXNET dhe FLAME, ata po na bombardojnë neve gjatë
gjithë kohës, nuk mund të qëndrojmë të qetë - hack si masë ndëshkimi".

Një ekspert tjetër i sigurisë, Paul Roberts, thotë se të dhënat e
publikuara nga grupi, për të cilin thotë se nuk ka shumë informata se
kush janë, janë mjaftë të ndjeshme.

"Ata pretendojnë se sulmi ndaj weather.gov është vetëm një prej shumë
sulmeve kibernetike ndaj Qeverisë amerikane të cilat ky grup i ka
ndërmarr, ndërkaq kanë thënë se pritet të publikohen edhe informata
tjera", thotë Roberts.