Akuzat e Martyt dëmtojnë imazhin e SHBA-ve dhe BE-së kunder H.Thaqit

Njohësi i mirë i rrethanave në Ballkan, britaniku Misha Glenny, akuzat ndaj kryeministrit në largim Hashim Thaçi për krime gjatë luftës, i ka cilësuar si “shpërthyese”.


Autor i librit “Mcmafia”, që trajton temën e krimit të organizuar në Ballkan, ka thënë se megjithëse Këshilli i Evropës nuk ka shumë peshë apo ndikim mbi qeveritë, por raporti i Dick Martyt dëmton imazhin e vetë SHBA-së dhe Evropës, sepse lë të kuptohet që ato kanë mbyllur sytë duke lejuar të ndodhin këto krime.Në një intervistë për BBC-së në shqip, Glenny ka thënë se ky raport përmban akuza kaq shumë të rënda në adresë të qeverisë së Kosovës, dhe sidomos ndaj kryeministrit në largim dhe, ndoshta, kryeministrit të ardhshëm, Hashim Thaçi.“Këto janë akuza për lidhje me krimin e organizuar, trafikim armësh e kështu me radhë. Por raporti dëmton edhe vetë imazhin e SHBA-ve dhe aleatëve në Evropë, përfshirë Britaninë e Madhe, pasi në raport thuhet se Washigtoni dhe të gjithë ata që e përkrahën UÇK-në, mbyllën sytë përpara këtyre gjërave të tmerrshme që po ndodhnin në Kosovë, ku nuk kishte vetëm trafikim armësh dhe droge, por edhe tregti të paligjshme të organeve njerëzore”.

Sipas Glennyt, çështja e serbëve të kapur nga UÇK-ja, fillimisht u ngrit në librin e ish-kryeprokurores së Tribunalit të Hagës, Carla del Ponte, ndonëse ajo nuk e çoi këtë çështje në gjykatë. “Në këtë libër ajo shkruan se serbët që mbaheshin nga UÇK-ja gjatë luftës, u përdorën për t'iu marrë organet, të cilat më pas shiteshin, kryesisht, për të mbledhur fonde për të financuar aktivitetin e UÇK-së. Pas luftës ky lloj aktiviteti u zgjerua. Ka pasur mjekë dhe persona të tjerë të cilët kanë paguar për të blerë organe nga shtetas të vendeve të varfra, si Kazakistani. Më pas, këto organe, p.sh veshka u janë shitur klientëve të pasur në Amerikë apo Izrael. Kombet e Bashkuara e konsiderojnë këtë si një ndër format më të ashpra të krimit të organizuar dhe kjo do të ketë pasoja të rënda”.Duke folur për periudhën për të cilën flitet në raport, Glenny ka thënë se raporti nuk është shumë specifik për këtë. “Rastet specifike që përmenden në këtë raport janë nga viti 1999 e këtej. Disa nga këto raste po hetohen momentalisht dhe janë në proces gjyqësor në Kosovë, ku sistemi i drejtësisë është nën mbikëqyrjen e EULEX-it. Pra ka disa raste që po hetohen dhe në raport nuk specifikohet nëse trafikimi i organeve njerëzore vazhdon sot e kësaj dite. Gjithsesi, në akuzat e ngritura nga Dick Marty në raportin e tij, flitet fare qartë për rolin që Hashim Thaçi po luan si një lloj bosi e një organizate të madhe kriminale në Kosovë”.