“Google Art Project“ sjell udhëtimin virtual nëpër galeri

Kaliforni, 6 shkurt - “Google“ më në fund ka treguar interesim edhe për artin. Pas projektit “Google Body“, që sjell një udhëtim virtual nëpër anatominë trupore, tash e tutje do të mund të “vizitohen“ edhe disa prej galerive e muzeve më të mëdha në botë. “Google Art Project“ është oferta më e re e makinës kërkuese që mundëson qasje në versionet digjitale të galerive më në zë në botë si Metropolitana, MoMa, Alte Nationalgalerie në Berlin, Rijksmuseum në Roterdam, Tate-in britanik, galerinë Uffizi në Firencë e shumë të tjera.

Teknologjia që kjo kompani ka përdorur në projektin e lansuar së fundi është e njëjtë me atë të “Google Street View“, me mundësinë e rrotullimit në hapësirë për 360 shkallë njashtu si edhe të zmadhimit të një vepre të caktuar. Me këtë shëtitje virtuale është e mundur qasja në 385 hapësira të ndryshme galerish ku janë të ekspozuara 1 mijë vepra artistike të 486 artistëve të ndryshëm. Ta zëmë, pa pikë problemi mund të shihen qartë veprat e Cezannes apo të Botticellit, madje duke vëne re edhe detajet më të imëta në to.

Një gjë të tillë e mundëson teknologjia e close up-it, e cila është 1 mijë herë më e fuqishme se fotografia digjitale. Kritikët e kanë cilësuar “Google Art Project“ si një potez revolucionar të Google me të cilin dëshmon se sa është e nevojshme që historia të ndjekë hapin e teknologjisë. Medje, do të mund të thuhej që kjo qasje në muzetë anekënd botës është edhe më e mirë sesa ajo reale, kur kemi parasysh turmat e njerëzve para një vepre të caktuar.