Plani amerikan i mbrojtës nga raketat pa mbështetjen çeke

Republika Çeke ka vendosur që të mos marrë pjesë në sistemin amerikan për mbrojtjen nga raketat balistike për Evropë.
Plani amerikan për sistemin e mbrojtjes nga raketat balistike në Evropë ka kaluar përmes shumë ndryshimeve gjatë viteve të fundit. Propozimi fillestar i administratës së presidentit Bush kërkonte dislokimin e 10 interceptorëve për raketa në Poloni dhe një objekt radarësh në Republikën Çeke. Ky projekt trajtonte kërcënimin iranian me raketa balistike me rreze të gjata veprimi.

Por administrata e presidentit Obama ndoqi një tjetër pikëpamje. Zyrtarët amerikanë thanë se kërcënimi vjen nga armët iraniane me rreze të shkurtër dhe të mesme veprimi.

Kështu, në shtator të vitit 2009, Obama anuloi planin e pararendësit të tij, për një plan më të adaptueshëm. Propozimi i ri përfshin vendosjen e interceptorëve SM-3 në Poloni deri në vitin 2015 dhe në Rumani deri në vitin 2018. Këto propozime ende janë në zhvillim e sipër. Analistët thonë se raketat SM-3 aktualisht gjenden në bordin e anijeve të marinës amerikane, duke i dhënë planit të presidentit Obama fleksibilitetin që i mungonte propozimit të presidentit Bush.

Ekspertët thonë se zyrtarët në Republikën Çeke muajin e kaluar reaguan negativisht ndaj planit të presidentit Obama meqenëse kishin shpresa për objektin e radarëve të parashikuar në planin e presidentit Bush.

Rusia vazhdimisht është shprehur kundër planeve amerikane për sistemin evropian të mbrojtjes nga raketat ndërkontinentale. Moska nuk beson se synimi është mbrojtja nga sulmet me raketa nga vende si Irani. Zyrtarët rus e shohin sistemin se ka në shënjestër Moskën, një akuzë kjo e hedhur poshtë nga Shtetet e Bashkuara. Në anën tjetër, shumë vende të Paktit të Varshavës ende e shohin Moskën si kërcënim, por jo edhe Republika Çeke.